Филмот „Павилјон“ на режисерот Дино Мустафиќ ќе биде прикажан вечерва во 20 часот во киното „Фросина“ во Скопје, во рамките на фестивалот „Синедејс“. Филмот, во кој Македонија е копродуцент, ја имаше светката премиера на Сараевскиот филмски фестивал летово. Ова е последниот филм во кој играше актерот Мето Јовановски, покрај врвните актерски легенди од регионот: Раде Шербеџија, Зијах Соколовиќ, Миралем С. Зубчевиќ, Ксенија Пајиќ, Мирјана Карановиќ, Ермин Браво, Албан Укај. Македонски продуцент е „Круг филм“ од Скопје.
Зад камерата стојат Алмир Џиколи и Мустафа Мустафиќ, монтажата е на Владимир Гојун.
По години понижување и злоупотреба, жителите на Павилјонот, дом за стари лица, започнуваат бунт. Наоружани по нелегален пат, го заземаат домот, го држат персоналот како заложници и влегуваат во судир со властите. Нивната очајничка борба прераснува во политички и медиумски спектакл, а староста им станува предност: немаат што да загубат и подготвени се да се борат до самиот крај. Во Павилјонот се воспоставува нов поредок, воден од жед за одмазда и наталожен гнев, па секој обид за преговори со бунтовниците станува невозможен.
За останатата програма на „Синедејс“ денес, отворете на следниот ЛИНК.
